sannleikurinn er sagna bestur!

....og alltaf kemur það betur og betur fram að Ástþór er.......JÓLASVEINN

Ástþór kærir Þórunni

HK-Trimm 2008

Fór í vinnu í morgun eins og löghlýðinn einstaklingur. Ætlaði að semja við "partnerinn" minn um að fá að fara ca 30 mín fyrr því ég ætlaði að taka þátt í móti hjá HK í Digranesi. Talaði við Magga og auðvitað sagði hann að þetta var ekkert mál, svo mikið krútt þessi drengur

Það passaði nett svona að um hádegi fylltist búðin af fólki og var gjörsamlega brjálað að gera. Maður náði ekki svo mikið sem að fá sér kaffibolla eða neitt. Ég var með viðskiptavini sem sýndu ekkert fararsnið kl 14 svo ég sýndi þeim 100% kurteisi og lét ekki á neinu bera að ég færi að huga að brottför. Þau fóru rúmlega korteri síðar og þá var nú farið að róast aðeins sem betur fer, þetta var skuggalegt um tíma.

Skellti mér svo á mótið og tók þátt í því með mínu liði að hala inn verðlaunapening  Fengum semsagt bronsið í mínu liði. Mér finnst það bara ásættanlegt.....ekki það að gullið hefði verið betra.....en látum þetta gott heita í bili.

Því til sönnunar læt ég þessa mynd fylgja

 

Nú er bara "A" liðið eftir og eins gott að þær komi ekki tómhentar heim annað kvöld

Finding Nemo

Eitthvað virtist dælan í fiskabúrinu vera farið að gefa sig svo vatnið varð gruggugra með hverjum deginum sem leið. Loks blöskraði mér þetta framtaksleysi í sjálfri mér svo ég ákvað að taka fiskabúrið í gegn. Náði mér í fötu og vatnssugu (sem er með stórum hólk framan á og virkar sem ryksuga á sandinn og mjó slanga sem fer úr hólknum og ég beintengi við salernið) Hefst handa við að dæla vatninu af búrinu með ryksugunni. Öðru hvoru helli ég einni skúringafötu af köldu vatni ofan í búrið til fiskanna svo ég fái pínu hreyfingu á sandinn á botninum.

Fiskarnir eru frekar stórir eða frá 8cm-ca 15 cm langir. Eftir langa mæðu náði ég dælunni og fór að vinna í því að hreinsa hana og finna skýringuna á því hvers vegna hún stoppaði, á meðan sá ryksugan um að tæma búrið af vatninu.

Skyndilega fannst mér hljóðið í vatnsslöngunni vera eitthvað skrýtið svo ég fór að aðgæta það og sá mér það til skelfingar að einn gullfiskurinn okkar, hann Herra Varir, hafði gert tilraun til að heimsækja klósettið upp á eigin spýtur og notað til þess aðferðir sem voru brúkaðar í teiknimyndinni um Leitin að Nemo, eða stungið forvitnu nefinu upp í ryksuguna svo hann sogaðist upp um rörið og sat fastur  innst inn í því við sigtið og gat sig hvergi hreyft.

Í panikki vissi ég ekki til hvaða bragðs skyldi taka svo ég tók á það ráð að rífa suguna upp úr búrinu svo vatnið tæmdist þar en eftir sat fjandans fiskurinn og gat sig hvergi fært!

Með því að hrista suguna vel og vandlega losnaði fiskurinn og fór aftur til vina sinna í búrinu. Eftir þetta setti ég blátt bann á að fiskarnir fengju að horfa meira á Nemó....meiru ósiðirnir í þessum óþekka trúðfisk

Drama queen í ham

Drama queen kom heim eftir vinnu í gær um miðnætti. Tilkynnti mér það að hún þyrfti að vera mætt í skólann kl 8:00. Ég sagði við hana að ef hún vildi vera mætt á réttum tíma, þá yrði hún gjöra svo vel að aðstoða mig með systurnar um morguninn. Hún spurði þá klukkan hvað væri best að vekja þær og ég sagði að 7:00 væri æskilegt svo hún samdi um 7:05. Já, ekkert mál sagði ég.

Á slaginu 7:05 kom hún inn til mín til að vekja litla flóttamanninn sem hafði farið úr sínu rúmi yfir í flóttamannabúðirnar (okkar rúm). Ég ákvað að láta ekki á mér standa og fór frammúr.

Á nokkrum mínútum var Drama queen búin að klæða litlu systur sína, gefa henni morgunmat og greiða ásamt því að koma gelgjunni frammúr og koma henni í skilning um það að hún verði að hafa sig alla við til þess að verða ekki skilin eftir. (það er nóg fyrir hana því hún nennir engan veginn að labba í skólann) og til að toppa það, þá hafði hún vaknað mjög snemma til þess að fara í sturtu og vera búin að borða áður en ballið byrjaði.

Ég var rétt búin að gera mig klára þegar ég heyrði í Drama queen kalla yfir húsið; "5 mínútur í brottför". Í hendingskasti lít ég á klukkuna og þá var hún nákvæmlega 7:35 en þá átti ég eftir að hræra mér einhvern hollustudrykk og taka með mér hádegisnesti svo ég mátti hafa hraðann á svo ÉG yrði ekki skilin eftir.

Þetta finnst mér mjög merkilegt allt saman því hún hefur ekki viðurnefnið "Drama queen" fyrir ekki neitt og hefur verið talin hressari seinnipartinn eða jafnvel á næturnar en hún er á morgnana svona yfir höfuð.

Það er allavega mjög jákvætt að hún taki skólann sinn alvarlega og vilji mæta á réttum tíma. Hún nefndi það við mig í byrjun annar að þessa önnina ætlar hún að ná 100% mætingu

Í verslunarleiðangri með þessa yngstu

Ákvað að skella mér í Po.P að versla buxur á þessa yngstu. ´ÞEg var í "sendum og sækjum" með mið-dótturina og fékk ég rétt rúman klukku tíma til þess að skjótast í Kringluna og til baka aftur áður en ég þyrfti að sækja gelgjuna. Tíminn var nýttur vel, þessari yngstu til mikillar gremju því hún þolir ekki búðir.

Við mæðgur komum í Kringluna og þar sem ég vissi nákvæmlega hvað ég vildi, var ekkert að vanbúnaði en að byrja maraþonið í Po.P. Sunna var ekki alveg að meika það þarna í versluninni svo hún ákvað að fara að skoða föt á sig sjálfa. Kom með föt sem voru í flestum tilfellum hennar númer en ég sóttist eftir örlítið stærra en það sem passar akkúrat svo ég ákvað að virkja hana örlítið. Sagði henni að hún mætti skoða föt sem eru með númerinu einn - tveir - tveir (122), það væri númerið sem ég ætlaði að fá á hana núna. Hún upp veðraðist af þessu og loks fékk ég frið til að skoða mig um.

Ég hafði fundið einar buxur og eina peysu sem var á herðatré sem ég setti yfir handlegginn minn og hélt áfram að skoða. Öðru hvoru heyri ég í litlunni minni kallandi að hún hafi fundið réttu stærðina. Alltaf hljóp hún til mín til að sýna mér viðkomandi flík og svo eins og flest börn gera, þá nuddaði hún sér alltaf utan í mig þegar hún kom en svo var hún farin aftur. Ég veitti þessu enga sérstaka athygli þar sem ég fékk allavega frið fyrir nöldri um að nenna ekki búðarrölti.

Loks kom að því að ég var tilbúin til að fara á kassa, fann 2 buxur, 2 peysur og 1 pils sem ég var til í að versla á stelpuna. Mér fannst þetta ágætis árangur en fötin voru ískyggilega þung svona þegar á hólminn var komið. Á kassa slengdi ég öllum fötunum og sá þá mér til skelfingar að í hvert sinn sem stelpan kom til að sýna mér réttu stærðina, þá hengdi hún viðkomandi flík á herðatréshankann á peysunni sem ég fann í upphafi verslunarinnar. Á þetta herðatré hafði hún hengt ca 2 pils, 4 peysur, 3 buxur og 1 legging. Allt í einu stóð ég eins og álfur við kassann eins og lifandi herðatré!! Vandræðaleg baðst ég afsökunar og vildi fá smá stund til að greiða úr flækjunni með dóttir minni.

Ég sá þá að þetta voru mistök að leita sjálf af fötum á stelpuna, átti bara að segja henni strax að finna föt og koma með þau til mín og á meðan hefði ég geta setið hin rólegasta og lesið blöðin.

Við mæðgur komumst að samkomulagi um hvað af ÖLLU þessu fatafargi skyldi keypt. Hún var samt ekki alveg nægilega sátt þar sem hvergi voru Barbie buxur í þessari flóru svo við sömdum um 2 buxur, 2 peysur og 1 pils og að við færum í Hagkaup og fyndum Barbie buxur.

Í Hagkaup skunduðum við svo og þar fundum við fínar Barbie gallabuxur og eina Barbie peysu. Hamingjusöm prinsessa sofnaði svo í rúminu sínu í kvöld, hlustandi á Skilaboðaskjóðuna í hljómtækjasamstæðunni.

Styðjum Ástþór til sigurs

.....í allt öðru en forsetakosningum!!

Ekki sérstakan áhuga á starfi forseta

Ást við fyrstu sýn

Mér finnst óendanlega gaman að leika mér með myndavélina. Þessi mynd er ein af mínum tilraunum sem ég geri.

Öll að koma til í skrokknum aftur. Fór til læknis til að fá ávísun á meira læknadóp. Ætti að vera til í smá blakmót næstu helgi ef ekkert bakslag kemur uppá  (sem að verður ekki....ég er búin að ákveða það!) Það þarf bara að taka "Secret" á þetta og þá gengur allt upp....er það ekki þannig sem það virkar?? Miðað við myndina/bókina

Nú verður maður að taka "Secret" á helgina, slá um sig með gullinu á HK mótinu

Ég ákvað að prufa þetta og hugsaði stíft um það að það kæmi almennilegt gólfefni á gólfið hjá mér. Sama hvað ég hugsaði og dreymdi....það er ekki enn komið  Það er spurning hvað maður gerir þá

Með lífið að láni

Það er ótrúlegt hvað hurð getur skollið nærri hælum. Var að mynda lítinn frænda á gamlárskvöld og spáði ekki mikið í leikföngunum hjá stóru strákunum. Þeir voru að missa sig yfir þessum flugelda dóti svo ég ákvað að missa mig á myndavélinni á meðan stóru strákarnir léku sér.

Þeir voru að skjóta upp stórum flugeldum og einn flugeldurinn fór upp......og niður aftur....á prikinu og ákvað að springa í rúmlega 2m hæð og til að toppa það, þá stóð 12 ára gamall frændi rétt við þegar hún kemur niður og springur. Glóðin slettist yfir okkur öll og þegar ég fór að skoða myndina sá ég hvað þessi 12 ára var nærri og hefði ekki þurft að spyrja að leikslokum ef þessi flugeldur hefði verið nokkrum sentímetrum nær!!!!!

Myndin talar sínu máli.

Einu sinni var......

Tíminn er ótrúlega fljótur að líða. Jólin komu og jólin....tja....fóru!  Ég var búin að undirbúa mig undir erfið jól en það ótrúlega gerðist....þau voru bara alveg ágæt

Skelltum okkur norður til Akureyrar milli jóla og nýárs. Gistum hjá tengdó og það fór sko óskaplega vel um okkur þar. Hittum fólk....reyndar færri en við ætluðum okkur...en það verður að hafa það....bætum okkur bara næst

Elsta daman mín er komin með æfingaleyfi á bíl. Fór með hana í bíltúr að versla inn skólabækur fyrir skólann. Fórum að sjálfsögðu á mesta anna tíma og það á föstudegi, leyfði henni að keyra....jájá... hún stóð sig ágætlega greyið. Auðvitað var þetta að henda henni beint í djúpu laugina en hún kláraði sig alveg á þessu. Mamman með nokkur auka feilpúst á hjarta.....en það sem ekki drepur mann herðir

Þegar ég kom heim í dag beið mín lítill pakki. Ég kíkti í pakkann og var það bloggvinagjöfin frá henni Mörtu sem beið mín. Óskaplega fallegur hálsklútur í brúnu og gylltu. Takk Marta. Þetta var æði

Skellti mér í ræktina í gær. Var kannski ekki alveg nógu góð fyrir en þetta skánaði ekki svo ég hringdi í sjúkraþjálfann aftur. Hann tók mig inn á teppið og eftir pot og pikk ákvað hann að gefa mér raflost!  Raflostið átti að kveikja á svokölluðu endorfíni sem er "verkjalyf" sem líkaminn býr til sjálfur og virkar á taugakerfið. Ég var í raflosti í einhverjar 30-40 mínútur og varð ég strax mikið skárri af verkjum svo ég ákvað að skella mér og versla mér eitt svona tæki eða svo.....allavega heilnæmara en að gleypa reiðinnar býsn af verkjalyfjum.....!!! Eftir tímann var ég rosalega eftir mig og langaði mest heim upp í rúm. Ég var með svo mikinn krampa í hendinni að ég barðist við sinadrátt í nokkra klukkutíma á eftir frá öxl fram í fingurgóma. Sjúkrinn sagði að þetta sem væri að hrjá mig væri svokallaður taugakrampi í öxlum og hálsi sem leiðir út í hendur.....æði ekki satt...

Veit ekki hvort þetta eru eftirköstin eftir raflostið en annar fóturinn frá tám og upp að nára er svo viðkvæmur fyrir snertingu að allt sem heitir snerting, fatnaður eða annað, virkar eins og sé verið að rispa mig inn í hold. Ekki sérlega þægilegt því ég þarf jú að stíga í fótinn....og það er einfaldlega VONT! Þetta verður vonandi búið í fyrramálið því ég þarf jú að vinna frá 9-15 í www.sturta.is svo ekki þýðir að vera eitthvað farlama þar!!