misskilningur á misskilning ofan

Nú á Viktorían mín ekki nema 5 vikur eftir af meðgöngunni. Eins og venjulega lítur hún rosalega vel út þessi elska.

Hún hringir í mig og spyr hvort ég sé til í að koma með henni og skoða fæðingardeildina. Biggi var á sjónum og kemst ekki í land í tæka tíð. Það var sjálfsagt mál að fara með henni og hafði ég ekki síður gaman af því að skoða deildina....án þess að fara sjálf í fæðingu...hef aldrei gert það.

Ég segi við yngri dömurnar mínar að ég þurfi að skreppa og pabbi komi heim innan tíðar. Dísin mín spyr mig hvert ég sé að fara og ég segi henni einfaldlega að ég sé að fara með Viktoríu að skoða fæðingardeildina á spítalanum. Ég kvaddi dömurnar og fór.  

Við Viktoría mælum okkur mót. Ég var varla komin út úr húsi þegar mamma hringir í farsímann og ég heyri að henni er mikið um að tala við mig. Spyr hvort ég geti talað og hvort ekki allt sé í lagi. Ég hváði við og sagði að allt væri í stakasta lagi og vissi ekki hvar hún fengi aðrar upplýsingar. Hún vildi ekki svara því og spurði jafnframt hvort Viktoría sé ekki í lagi og hvar hún er.

Ég var ekki alveg að skilja þennan asa og fékk hana til að anda með nefinu og segja mér hvað henni lægi á hjarta.

Þá hafði hún móðir mín hringt heim og fengið þær upplýsingar hjá stelpunum heima að ég væri inn á fæðingardeild með Viktoríu!!!!!!

Svona getur misskilningurinn orðið.

Inn á fæðingardeildinni hitti ég gamla kunningjakonu sem er alltaf jafn almennileg þegar við hittumst. Hún varð stóreyg þegar hún sá mig með hópnum sem var að skoða fæðingardeildina og spurði hvort ég væri að koma aftur!?....Nei..ég benti á dóttur mína og sagði að ég væri bara með henni, þá stækkuðu augu hennar enn frekar og ég heyrði að hún fékk smá sjokk þegar hún sagði: "ha! ertu að verða AMMA?"

Ég hló við og sagðist ekki svo vera...heldur væri hún Viktoría mín bara að verða mamma 

Ég veit ekki hvar fólk heldur það að ÉG sé að verða AMMA....bara skil þetta ekki!! 

Skemmtilegur heimur  

hér er svo prinsessan mín komin 30v 

 

...á þessu heimili er kynskiptingur!

Þetta heimili er eiginlega dýrabær. Hér er að finna hinar ýmsu tegundir dýra og höfum við reynt að hafa kynskiptinguna nokkuð jafna.

Í stofunni er 300L fiskabúr með stórum gullfiskum og er nokkuð jöfn skipting á milli "kvenna" og "karla" í búrinu að undanskildum sniglunum sem einfaldlega breyta kynhneigð sinni eftir þeirra "huga"...ef hann annars er!

Svo má finna aðeins stærri dýr eins og Naggrísinn Mikka sem yngsta dýrið mitt á og er hann voðalegur prins...lætur allt yfir sig ganga...svo sem að láta klæða sig í dúkkuföt, troða sér í dúkkuvagna og fara út að ganga.Svo kemur hún Kara sem er nú kannski ekki alveg jafn samvinnuþýð og Mikki og lætur alveg í sér "heyra" ef hún er ekki sátt við það sem henni er boðið.

Svo kom að því að það átti að fara með Köru út að ganga og var fundið til beislið hennar og því troðið á. Eins og áður hefur komið fram þá lætur hún ekki allt yfir sig ganga svo það þurfti dálitla útsjónarsemi að koma ólinni um hálsinn og utan um búkinn svo hún sleppi ekki svo auðveldlega. Sunna mín var að hjálpa mér og bað ég hana um að vippa ólinni utan um hana um leið og ég héldi henni niðri.

Ég sný kanínunni á bakið til að setja ólina utan um búkinn og þá rekur Sunna augun í spenana hennar og bendir á þá að þeir séu kannski bara full stórir svona miðað við það að ekki séu ungar á spena. Ég lít á þessa stóru spena og sé þar sem þeir líktust frekar hnetum en spenum.....mér bregður við þetta því í tæpt ár hefur þetta dýr verið HÚN og þarna var ég ekki að ná því að "hún" breyttist í "hann" á ca 5 sekúndum!

Ég geri lítið úr þessu og sendi hana út að ganga með "hana" Köru. Á eftir sat ég hugsi inn í stofu. Mér leið eins og einhver hefði slegið mig utanundir...ekki það að það sé slæmt að kanínan skuli hafa verið strákur þegar upp var staðið...heldur hvernig breytir maður nafninu Kara í strákanafn?!?!