mont!

Ég verð að monta mig á þessari líka flottu mynd sem ég tók.

Fyrir nokkrum vikum tók ég þátt í ljósmyndakeppni og vann. Verðlaunin voru prentun á striga svo ég lét prenta þessa mynd á striga. Margir hafa hváð þegar þeir sjá myndina en hún er tekin yfir Pollinn á Akureyri.

Ég fór svo með myndina í innrömmun sem kostaði augun úr en vel þess virði að láta gera. Gaurinn í innrömmuninni var rosalega hrifinn af myndinni en ég fékk samt engan afslátt ....óréttlátt! (allt í lagi...ekki svo óréttlátt)

Hér er hún svo komin á vegginn.

Orginal myndi er hér.

 

Söknuður

Á morgun 9. janúar eru 10 mánuðir frá því að stjúpi minn dó. Ég dró stelpurnar með mér að gröf Ásgríms og áttum við notalega stund saman. Yngri dömurnar tóku smá leik og fengu að hlæja aðeins.

Hér er svo útkoman af samverustundinni.

 Svo fengu vinkonurnar að bregða sér á leik

 

Skynsamlega tekið á málum

Það hafa margir spurt mig hvað varð úr þessari kvörtun með jólamatinn.

Ég semsagt hringdi og talaði við verslunarstjórann í Hagkaup Garðabæ sem kom mér svo í samband við þá í Ferskum kjötvörum. Hann vildi láta okkur hafa sárabætur fyrir jólasteikina og eins og hann sagði réttilega að það er ekkert sem bætir jólamatinn en þá er þetta allavega eitthvað smávegis. Hans afsökun var að þetta hafi verið hrútur sem hafi verið slátrað of seint.

Skömmu síðar hringdi verslunarstjóri Hagkaup Garðabæ til að heyra niðurstöðuna og bað svo um að fá að gera eitthvað fyrir okkur líka.

Ég hafði svo samband við kappana þegar við komum í bæinn og byrjuðum við í Hagkaup og það bauð hann okkur upp á kjöt úr kjötborði að eigin vali og þegar valið hafði verið tekið fór hann á bakvið og kom með til baka 3.5kg af kjötinu og sagðist ætla að fara með þetta á þjónustuborðið og hann skyldi setja eitthvað með í pokann.

Við kláruðum að versla og fórum svo að borga og þegar okkur var afhentur pokinn kom í ljós ekki bara kjötið heldur líka ísterta frá Jóa Fel og vegleg ostakarfa með öllu tilheyrandi. Við skildum sátt og ég mjög ánægð með þessa þjónustu.

Svo hittum við þá í Ferskum kjötvörum og létu þeir okkur hafa Svínalundir, lambalæri og lambafile svo sá matur myndi sennilega duga fyrir 10-15 manns. Við skildum sátt þar líka.

Við buðum svo fólki í mat og voru svínalundir eldaðar og ístertan var í eftirrétt. Þegar ég fékk mér væna sneið af þessari líka dásamlegu tertu, dró ég út úr mér ágætan skammt af límbandi úr miðri tertunni!!!!

Spurning um að kvarta

 

Fór í smá tilraunastarfsemi og tók mynd af sjálflýsandi önd!

jólin kvödd

Nú eru jólin formlega búin og síðasti séns að taka myndir af jólaskrautinu!!!

Situr 66°N ekki við sama borð?

Ég veit ekki betur en að 66°N láti sauma sitt dót í Kína og það sé einnig að finna loðkraga í hettum hjá þeim!

Væri gaman að heyra hvort þeir séu með eitthvað "betri" vöru!

Harma umfjöllun um Cintamani

Gleðilegt ár kæru netverjar

Byrja árið með því að skella inn nokkrum myndum frá áramótunum.

 

 

Hið ljúfa líf

Síðustu dagar hafa verið mjög ljúfir. Við áttum notalegt aðfangadagskvöld og góðan eftirrétt....aðalrétturinn klikkaði svo um munaði!

Keyptum okkur úrbeinaðan lambahrygg sem var búið að setja fyllingu í og troða í net. Leit rosalega vel út en eitthvað var lyktin skrítin þegar þetta var farið að hitna í ofninum. Keyptum þetta 23. des svo þetta gat ekki verið ónýtt.

Eldaði þetta samviskusamlega og bar svo á borð og ekki skánaði lyktin þegar þetta var full eldað. og enn síður skánaði bragðið!!!

Kjötið var bæði skemmt og með þráabragði. Bara viðbjóður. Enduðum á því að borða eftirréttinn og láta þar við sitja. Ætlaði samt ekki að láta verslunina komast upp með þetta svo ég geymdi pakkningarnar en varð að henda kjötinu og koma því út í tunnu. Svo slæm var lyktin.

Skruppum svo norður annan í jólum og hringdi svo í verslunina á laugardeginum og talaði við verslunarstjórann. Held að niðurstaðan verði ágæt því þeir ætla að bæta þetta eitthvað upp. Eins gott því þegar maður er búinn að elda á aðfangadagskvöldi er ekki beinlínis hægt að stökkva út í búð til að redda nýju kjöti!!

Sem betur fer gerist svona ekki oft. Það verður bara þeim mun betra á gamlársdag.

Fór með gamalli vinkonu á rúntinn í gær að taka myndir. Hér eru svo nokkrar ágætar.

Sá rauðklæddi staðinn að verki!

Fátt er meira rætt um á þessu heimili en rauðklæddi gjafmildi karlinn. Á hverjum morgni er komið hlaupandi upp í rúm til okkar til að sýna það sem sveinki kom með í skóinn. Oft hefur maður velt því fyrir sér hvers vegna í ósköpunum maður er að skrökva svona að börnunum. Þetta er svo mikill skellur þegar þau fatta þetta sjálf að maður verður stimplaður sem lygalaupur.

Síðustu nótt (aðfaranótt laugardags) um kl 1:30 var sveinki á ferð. Embættismaðurinn fer inn í herbergi dömunnar og kyssir hana á ennið til að athuga hvort hún væri ekki örugglega sofandi því um þetta leyti er hún oft að vakna til að fara að pissa. Ekki virtist hún bæra á sér svo gjafmildi karlinn fór því fram til að finna "skóvöruna".

Sveinkinn læðist aftur inn með nokkra blýanta af hinum ýmsum stærðum og gerðum og bréfsefni sem ekki komst í skóinn. Blýantarnir runnu ljúft ofan í skóinn en hann varð að hagræða bréfsefninu og lagði það svo við hliðina á skónum. Að svo búnu lét hann sig hverfa.

Um morguninn kem ég svo fram og þar bíður mín ískalt augnarráð og litla ráðskonan mín segir hranalega við mig um leið og hún lyftir upp bréfsefninu:

Mamma, HVAÐ er þetta til dæmis?

mamman: uuuh....má ég sjá....ég veit ekki

Sunna: þú ættir nú að vita það. Þú komst með þetta SJÁLF í gær og settir við skóinn minn

mamman: (gjörsamlega í hnút) HA ÉG?! neih..ég gerði það ekki!

Sunna: JÚ, ÉG SÁ ÞIG. Hvað er þetta (og veifaði þessu aftur framan í mig)

mamman: sko...sjáðu nú til... (reyndi eins og ég GAT til að finna hentuga lygi) ...ég heyrði eitthvað hljóð inn í herberginu þínu og ég ákvað að athuga þetta og þá sá ég þetta á gólfinu svo ég fór með þetta fram til að athuga hvað þetta var og svo skilaði ég þessu strax aftur.

sunna: (með hneykslun og vantrúun í röddinni) jahá...einmitt það já

og með það snéri hún sér frá mér og leit ekki á mig aftur. Mér fannst réttast að ég renndi mér bara aftur upp í rúm til að jafna mig á þessum lygum.